Durant in mais han gì lieu en Svizra acziuns che gidan a realisar la Convenziun da l’ONU davart ils dretgs dals umans cun impediments.
Communicaziun a las medias 12 da zercladur 2024
Finiziun dals Dis d’acziun naziunals per ils dretgs da las persunas cun impediments ils 15 da zercladur 2024
Ils 15 da zercladur 2024 ha lieu a Genevra la festa da finiziun dals Dis d’acziun naziunals per ils dretgs da las persunas cun impediments, quai cun la participaziun da la cussegliera federala Elisabeth Baume-Schneider. La bilantscha dal mais d’acziun è positiva: Las var 1000 occurrenzas che han gì lieu durant in mais en tut la Svizra han attratg bleras visitadras e visitaders cun e senza impediments. Inizià ils Dis d’acziun per ils dretgs da las persunas cun impediments han l’Uffizi federal per l’egualitad da persunas cun impediments UFPI e la Conferenza da las directuras e dals directurs chantunals dals affars socials CDAS, quai cun la finamira da sensibilisar la publicitad per il tema inclusiun e dretgs da las persunas cun impediments.
Pussibilitar in barat tranter persunas cun impediments e persunas senza impediments sco er stgaffir ina conscienza per l’impurtanza dals dretgs da las persunas cun impediments: quai è stada la finamira dals Dis d’acziun naziunals per ils dretgs da las persunas cun impediments. Il mais passà èn quests dis d’acziun vegnids realisads per l’emprima giada en Svizra. Sonda, ils 15 da zercladur 2024, ha lieu a Genevra la festa da finiziun cun in pled da la cussegliera federala Elisabeth Baume-Schneider.
La bilantscha dal mais d’acziun è positiva. En l’entira Svizra èn vegnidas organisadas var 1000 occurrenzas che han attratg in grond public, per exempel speeddating, curs intensivs da la lingua da segns, visitas guidadas da museums e da citads sco er sessiuns chantunalas da persunas cun impediments e jogging per persunas tschorvas. Il mintgadi da las persunas cun impediments è stà en il center dals dis d’acziun ed è uschia daventà visibel per la populaziun.
L’idea per il mais d’acziun è naschida pervia dal giubileum da 20 onns da la Lescha davart l’egualitad da persunas cun impediments en Svizra sco er pervia dal giubileum da 10 onns da la Convenziun da l’ONU davart ils dretgs da las persunas cun impediments. Il project è vegnì sustegnì da l’Uffizi federal per l’egualitad da persunas cun impediments UFPI e da la Conferenza da las directuras e dals directurs chantunals dals affars socials CDAS. Per las acziuns han ins chattà numerus partenaris en ils chantuns: il maun public, l’economia locala, instituziuns culturalas, uniuns, scolas autas, baselgias, organisaziuns ed instituziuns da persunas cun impediments han fatg part. Las proximas emnas evalueschan il UFPI e la CDAS detagliadamain ils Dis d’acziun naziunals per ils dretgs da las persunas cun impediments. En quest rom vegni er examinà, sch’i dat ina pussaivladad d’organisar regularmain ils dis d’acziun.
Infurmaziuns davart ils Dis d’acziun per ils dretgs da las persunas cun impediments stattan a disposiziun sin www.futur-inclusiun.prestage.ch.
► Las collavuraturas ed ils collavuraturs da las medias èn envidads a la festa da finiziun dals 15 da zercladur 2024 a Genevra:
https://avenir-inclusif.prestage.ch/ge/ceremonie-nationale-de-cloture-des-journees-daction-2024/
S’annunziar per plaschair sur ils contacts qua sutvart. Igl è pussaivel da far intervistas al lieu.
Videoclip da l’occurrenza d’avertura dals 15 da matg 2024 a Turitg: Occurrenza d’avertura dals Dis d’acziun per ils dretgs da las persunas cun impediments dals 15 da matg 2024 a Turitg
Contact/dumondas:
Giulia Brogini (direcziun generala dal project), Uffizi federal per l’egualitad da persunas cun impediments UFPI, giulia.brogini@gs-edi.admin.ch, +41 79 322 19 70
Thomas Schuler, manader dal sectur Politica da persunas cun impediments, Secretariat general CDAS, thomas.schuler@sodk.ch, +41 79 300 97 62
Bernard Favre (annunzias per l’occurrenza da finiziun dals 15 da zercladur 2024 a Genevra), directur Pôle handicaps, chantun Genevra, WW1WeWJtRnlaQzVtWVhaeVpTVTBNR1YwWVhRdVoyVXVZMmc9
+41 79 215 80 58
Bernhard Krauss, manader dal Post da coordinaziun per ils dretgs da las persunas cun impediments dal chantun Turitg, bernhard.krauss@sa.zh.ch, +41 79 756 75 06